El monte de la Comarca de la Sidra proporciona-y al visitante únicos balcones naturales con espectaculares vistes a la mar y a los cercanos Picos d'Europa y ente elles, los reis de los montes de la Comarca sidrera, el Puertu Sueve y Peñamayor.

El Puertu Sueve

El Puertu Sueve tien el so principal valir no averao a la mar de la que la separten namás que 5 kms, nos que vamos baxar de la cota más alta, el Picu Pienzu, a 1159 metros, a la vera del mar. Esti “Espaciu Protexíu “ de 12 kms de llargor amuesa una flora bien particular na que sobresalen la faya, el carrascu o’l texu, arbol esti con una gran carga simbólica. Nos riscos y viesques viven especies como’l xabaril, el venáu o la utre, ensin escaecer al Asturcón, amu indiscutible d’estes tierres.

Peñamayor

Visible per uquiera na fastera central asturiana, la sierra de Peñamayor álzase hasta algamar los 1197m. en La Triguera dando nun conxuntu d’incalculable valir paisaxísticu, nel que vamos topar foces llabraes pola sele erosión del agua na piedra calizo, lo mesmo que pequeñes viesques d’árboles caducifolios como’l carbayu, la faya o’l castañu, nes que la fauna montés, como’l frangüesu, xabaril o’l corzu viven al par del ganáu que paz nos ricos praos de les faldes d’esti cordal.