Atrévite a descubrir no fondero de les nueses pallabres a esos personaxes míticos que s'abellugen nes viesques y nos pueblos.

Ye la cultura asturiana bien rica en supersticiones y mitoloxía. De los misteriosos pobladores de les nueses viesques destaca'l cuélebre, ún de los personaxes más enigmáticos de la mitoloxía astur, con traces semeyaes a les d’una gran sierpe de zarpes terribles que vive nes cueves. La güestia, la figura más pantasmagórica de la superstición asturiana, ye una procesión d’almes en pena, difuntos vistíos con camisones blancos, llevando caún dos veles enceses na mano, o güesos humanos, que van caminando en doble ringlera pa visitar les cases nes qu’había un enfermu grave p’axuntalu a les sos files. Tamién taben el nuberu, que podría vese como l'amu de les tormentes que trai les tempestaes, va cargando les nubes y decide’l sitiu pa descargales, o’l diañu burllón, personax dañín que camuda n’animales y que nun se dedica namás qu’a facer picies,. Dellos exemplos del so comportamientu dicen que se vuelve invisible pa metese nes cases y ver desnudase a les muyeres, enrieda a les xentes de bona voluntá camudando en neñu abandonáu pa que les muyeres lu llaven y déan-y de mamar o camuda en burru testerón, que se-yos presenta a los pastores de la que vuelven al pueblu. D’ente toos rescamplen el Trasgu y la Xana, con lleendes espardíes per tola Comarca. El trasgu ye esi duendu domésticu cola piel prieta o anegratada, les piernes toriaes, uñes bien grandes nes manes y al que se lu conoz por tener un furacu na palma la mano izquierda y dir vistíu con gorru y camisón coloraos. El trasgu tien un comportamientu contradictoriu, delles veces écha-yos una gabita a los que viven na casa na qu’elli mora, collaborando en cualesquier xera y, otres veces, tirando, enllastrando, guardando les coses y comiendo como un fartón lo qu’atopa na cocina. Pue llegar a repunar en casa, ensin que’l mudase valga pa perdelu de vista. Pa echalu, lo meyor ye:: - Mandalu qu’enllene d’agua de mar un cestu afuracáu. El trasgu al nun ser a facer esta xera, vase coles oreyes gaches y enxamás vuelve apaecer. - Pañar poxa, granos de trigu o arena, cola mano izquierda: van esmucise-y pel furacu de la mano y el trasgu va marchar al nun ser a facer la xera que-y encomendaren. - Mandalu que ponga blanca una pelleya carneru negru estazándola escontra les piedres del ríu. "Les xanes" son espíritos de la Naturaleza con forma de muyer, qu’avecen vivir a la vera de ríos y fontes. Guapes enforma, podemos veles al par de los ríos peinando con batedores d’oru'l so pelo roxo y llargo y vistíes con llargues túniques blanques. Na Nueche Máxica por demás, la Nueche de San Xuan, el 24 de Xunu, les Xanes fáense visibles pa quien quiera contemplales solo con empobinase a los sitios nos que moren, como fontes, llagos y ríos. Aquellos que quieran acometer tal fazaña, van topase cola Xana sentada nun cantu, cantando y llevando un duviellu de filo pero si’l filo llegara a rompese, va escarmentase cruelmente al humanu hasta la so muerte, arrastrándolu al fondu l'agua.